Et eschte Kääzje em Advent
mäht mich still,
weil ich ens lustere will
deef in mich eren un wigg
in längs vergangene Kinderzick.
Dat zweite Kääzje em Advent
bring mich druss,
weil et em Überfluss
och Minsche jitt, die traurig blicke ,
Hunger han, un Ärme recke.
Dat dritte Kääzje em Advent
jit mir zo denke,
dat bei all dä vill Geschenke
de Wärme fählt su oft,
dodrup et Minschenhätz doch hoff.
Dat vierte Kääzje em Advent
mät mich esu fruh,
weil dat ich gläuve, su wie du,
dä jode Hellige Chress
för uns gebore es.
Un leuch dann mild dä Kääzeglanz
vor mir op däm schlichten Kranz,
kütt hellige Chressdaachsfridde,
hösch in des Hätzensmedde.